Adhoc nga mo-imbestigar sa traffic lights, CCTV project gisugyot ni Kon. Cabanlas

“KINING problema sa traffic lights dili mahimo nga ato ning ibuwag buwag kay moderno na karon ang sistema. Ang Closed-Circuit Television (CCTV) is integral part of the traffic lights.”

Kini ang gibutyag ni Konsehal Edgar Cabanlas, majority floor leader, atol sa sesyon sa konseho niadtong Lunes nga gidumala ni Bise Mayor Bebot Rodriguez agig reaksyon sa taho ni Konsehal Jonjon Rodriguez kabahin sa non-functional traffic lights ug ang estado sa CCTV sa syudad.

Matod sa konsehal nga makaibog tan-awon ang Davao City kay ang ilang CCTV apil na sa sistema sa traffic lights ug sa iyang nasayran, mokabat kini og P1.5B nga kantidad sa tuig 2014 pa.

Niini, kusganong gisugyot ni Konsehal Cabanlas ang paghangyo ni Mayor Klarex Uy nga mag-isyu og Executive Order (EO) aron makamugna og adhoc committe nga motutok sa imbestigasyon sa nangaging traffic lights ug CCTV project sa dakbayan ug aron  matun-an ang pundo alang sa pagbutang ug operasyon sa bag-ong CCTV ug traffic signalization system sa dakbayan. (RNQ/SP)