Achas nangusog masusi mga timbangan sa kamerkaduhan

Gisugyot ni Konsehal Rustico Ian Achas nga ipahigayon ang regular inspection sa tanang kamerkaduhan sa syudad aron masusi ang mga timbangan nga gigamit sa mga mamaligya-ay human namatikdan nga posibleng aduna pipila nga depektado.

Kini ang unod sa special report ni Achas atol sa sesyon sa konseho niadtong Lunes nga gidumala ni Bise Mayor Bebot Rodriguez.

Sumala ni Achas nga nadawat niya ang pipila ka mga reklamo sa mamalitay nga matod pa kulang ang timbang sa ilang gipalit nga manok human niya gitan-aw sa laing timbangan.

Gani, matud ni Achas, misulay siya pagpalit diha sa Puerto public market aron masuta ang maong reklamo ug nasuta nga adunay depekto sa timbangan. Kini dili lang sa timbangan sa manok kun dili lakip na sa mga timbangan sa namaligya og isda.

Tuyo ni Achas nga mapaabot kini sa konseho aron mahatagan sa igong pagtagad ug mapanalipdan ang katungod sa mga konsumedor ilabina nga nagsingabot na ang pasko.

Ang taho ni Achas giduso kini ni Bise Mayor Bebot Rodriguez ngadto sa Task Force Calibration ubos sa buhatan sa mamahandi sa syudad alang sa tukmang aksyon.