Achas nabalaka sa safety sa riders dihas lakang dili mag-helmet sa Poblacion area

Dili man supak si Konsehal Rustico Ian Achas sa ordinansa nga paluagan ang implementasyon sa pagsuot sa helmet sa Poblacion sa syudad apan nabalaka kini sa safety sa mga riders kay siya mismo usa ka rider ug nasinati na niini ang disgrasya diha sa kadalanan.

Kini ang gipaambit nga reaksyon ni Achas sa pagpalabang sa maong balaod atol sa sesyon sa konseho niadtong Lunes nga gidumala ni Bise Mayor Bebot Rodriguez.

Matud niya nga maayo ang katuyuan sa maong ordinansa tungod kay gitinguha nga malikayan ang mga krimen sa riding in tandem ug uban pang mga krimen nga gakahitabo sa syudad diin ang mga suspetsado naka helmet ug naka motor apan ang iyang gikabalaka ang seguridad sa rider nga nagmaneho sa motorsiklo nga walay gisul-ob nga helmet.

Niini, malaumon si Achas nga makatabang ang maong lakang sa kampanya kontra kriminalidad dala ang panawagan sa mga motorcycle riders nga magbinantayon ug mag-amping sa pagmaneho diha sa kadalanan ilabina kun dili magsul-ob og helmet.