Abaday motuki sa sugyot ordinansapagtunol og medical services sa hamtong

MAGTIGOM karong alas-9 sa buntag diha sa hawanan sa konseho ang komite sa senior citizens ni Konsehal Roger Abaday.

Tipik sa hisgutan sa tigom ang sugyot ordinansa ni Konsehal Bernie Esparcia nga maghatag og libreng medical services sa mga hamtong sama sa laboratory test, maintenance medicine, eye check-up ug antipara.

Segun sa sugyot, ang maong benepisyo madawat sa mga hamtong matag saulog sa ilang adlawng natawhan agig pahalipay kanila ug pag-ila sa ilang dakong naamot sa kalamboan sa dakbayan.

Ang pundo kuhaon gikan sa panudlanan sa gobyerno lokal sa opisina sa Senior Citizens Affairs (OSCA).

Niini, gidapit ni Abaday nga motambong sa tigom aron paghatag sa ilang mga panahum ug opinion sila si City Administrator Atty. Roy Hilario Raagas, City Legal Officer Atty. Kenneth Tamala, City Budget Officer Atty. Percy Salazar, City Accountant Atty. Beda Joy Elot, City Treasurer Jasmin Maagad, acting CSWD officer Anecia Tongson ug OSCA head Jessie Legaspi. (SP/MLRapanot)