Abaday misugyot nga tun-an ang giplano nga omento sa bayronon sa COWD

NANAWAGAN si Konsehal Roger Abaday, chairman sa komite sa environment, sa tanang mga konsumedor sa Cagayan de Oro Water District (COWD) nga kinahanglan magpakabana ug moapil sa himoong Public Hearing aron mapaabot ang mga sentimento kabahin sa giplanong pag-usbaw sa balayronon sa tubig.

Kini ang unod sa special report ni Konsehal Abaday atol sa sesyon sa Konseho niadtong Lunes nga gidumala ni Bise Mayor Bebot Rodriguez.

Sumala ni Abaday nga angayan matun-an ang mga legalidad sa maong probisyon aron masuta kon nahisubay ba kini sa lagda sa Office of the Government Corporate Counsel (OGCC) ug sa Local Water Utilities Administration (LWUA) nga maoy adunay gahom sa pag-aprobar sa water rate increase.

Nasayran nga gikan sa 218 pesos nga minimum nga balayronon sa tubig moabot na kini sa 294 pesos kung ipadayon ang pagpatuman sa 40-percent nga water rate increase sa Cagayan de Oro Water District.

Ang maong sugyot ni Konsehal Abaday giduso ni Bise Mayor Bebot Rodriguez ngadto sa komite sa public utilities ni Konsehal Eric Salcedo ug sa komite sa barangay affairs ni Konsehal Marlo Tabac alang sa dugang pagtuon ug rekomendasyon.  (MLR/SP)