Abaday gilaraw matabangan ang Bureau of Fire Protection sa ilang bag-ong ekipo

GILARAW ni Konsehal Roger Abaday, chairman sa komite sa public order and safety, nga matabangan ug mapangitaan og paagi nga masuportahan ang Bureau of Fire Protection sa syudad nga makabaton sa mga bag-ong fire-fighting equipment aron magamit sa ilang operasyon panahon sa sunog.

Sumala ni Konsehal Abaday nga daghan na sa mga firetrucks sa BFP ang daan na, diin ang mga fire hose usab niini adunay mga boslot lakip ang kakulangon sa mga oxygen mask sa mga bombero.

Gitinguha ni Abaday nga mapalambo ang kahimanan sa kabomberohan tungod kay sagad  sa mga bag-ong  gitukod nga mga gambalay sa syudad mga high rise building na.

Malaumon si Abaday nga ang mga dagkong negosyante sa syudad nga adunay mga higala sa ubang nasud maninguha nga maka donar sa firetrucks ug uban pang mga ekipo alang sa mga sakop sa Bureau of Fire Protection.

Naglaum usab si Abaday nga mapangitaan sa pundo sa lokal nga kagamhanan ang maong katuyoan. (MLR/SP/Photo from Councilor Abaday's FB page)