Balaodnon maproteksyonan kabataan subling gitun-an

Subling gitun-an sa komite sa women & family relations ni konsehal Edna Marban-Dahino ang balaodnon nga maghatag og proteksyon sa kabataan dinha sa ilang pagbyahe nga mag-inusara lang.

Ang tigom gitambongan sa mga hintungdang ahensya nga tigpatuman sa balaod uban ni konsehal Leon Gan kinsa mipasabot sa mga unod sa maong sugyot ordinansa nga dili makahasol sa mga mobyaheng kabataan ingon man sa mga ginikanan.

Lakip sa mga puntong buot mahatagan sa katin-awan ni Gan mao ang gipahamtang mga multa ug silot ngadto sa masapong makalapas sa probisyon sa nahisgotang balaodnon.

Niini, ang buhatan sa City Legal ug Balaod Mindanao gitahasan sa pagpanday sa maong balaodnon aron kini mahaom sa maong katuyoan.

Si konsehal Dahino namahayag nga dako ang iyang paningkamot nga mapalabang ang maong sugyot ordinansa tungod kay kini gikinahanglan sa mga ahensya nga gitahasan nga maprotektahan ang mga kabataan batok sa child trafficking.

Ang maong sugyot maglatid sa mga rekisitos alang sa mga minor de edad nga inusarang magbyahe ilabina dinha sa mga airports, pantalan ug bisan sa bus gikan dinhi sa dakbayan sa Cagayan de Oro. (APD)