Electronic payment facility sa City Hall mapatuman na

Ang konseho sa syudad ubos ni bise mayor Kikang Uy padayong nangita og paagi nga mahatagan sa kasayon ang tanan nga adunay transaksyon sa City Hall.

Sa sesyon sa konseho niadtong Lunes, hiniusang giuyonan ang Ordinansa nga naghatag og katungod ni Mayor Oscar Moreno pagpirma sa Memorandum of Agreement (MoA) tali sa Landbank of the Philippines nga nagdesignate sa Landbank isip sole depository ug financial settlement bank alang sa Electronic Payment Protal kon ePP Facility sa kagamhanan sa dakbayan.

Niini, ang dakbayan nagtumbok nga ang account nga mugnaon sa Landbank mao lamay magamit nga settlement account alang niadtong adunay mga transaksyon sa City Hall nga buot mobayad direkta sa banko.

Si konsehal Ian Mark Nacaya, chairman sa komite sa pamalaod ug usa sa nagpaluyo sa gipalabang nga ordinansa, mibutyag nga ang maong lakang nunot sa probisyon sa Republic Act 8972 kon Electronic Commerce Act of 2000 nga gitinguha alang sa paspas ug efficient nga alternative payment collection services sa mga adunay transaksyon sa City Hall.

Ako malaumon nga pinaagi sa maong lakang, dili na malangan ang atong mga magbubuhis sa ilang mga transaksyon sa City Hall tungod kay imbis na maghulat sa linya dinha sa buhatan sa City Treasurer, mamahimo naman kini mobayad pinaagi sa facility sa Landbank, pamahayag ni bise mayor Kikang Uy.