Ocon misugyot marelokar mga vendors diha sa City Hospital

Gisugyot ni konsehal Zaldy Ocon, chairman sa komite sa public works, nga marelokar ang mga vendors nga anaa atubangan sa JR Borja General Hospital aron dili mabalda sa himoong pagpanghinlo sa drainage sa mga residente sa Golden Village Homeowners Association.

Kini human personal nga mihimo og ocular inspection ang konsehal sa dapit og nakita nga giokopuhan sa mga sidewalk vendors ang drainage.

Lakip sa gisusi ni konsehal Ocon kun aduna ba silay sanitary permit sa ilang mga baligya ug diin sila mikuha sa linya sa ilang kuryente.

Atol sa panagtigom sa komite sa milabayng semana, gibutyag ni Jinky Collado, representante sa JR Borja General Hospital nga walay sanitary permit ang mga tindahan atbang sa hospital ug nakakutay lang sa usa ka linya ang kuryente sa matag tindahan butang nga gikompirmar ni Anchi Fajardo, representante sa mga mamaligyaay.

Nunot niini, gihangyo ni konsehal Ocon ang mga vendors nga mosunod sa palisiya sa gobyerno ilabina ang pagkuha sa sanitary permits.

Niini, naghangyo sa gamay nga lugway ug pagsabot si konsehal Ocon sa mga apektadong mamaligyaay aron mapangitaan kini sa insaktong solusyon. (El Kapitan)