Salcedo nangusog mapanumbalik quarry operations sa Cagayan de Oro

Si konsehal Enrico Salcedo, chairman sa komite sa cooperatives, mipadayag sa iyang kahingawa tungod sa pagkunhod sa kinitaan sa kagamhanan sa dakbayan tungod kay nahunong ang operasyon sa mountain quarry.


Kini ang unod sa iyang special report sa sesyon sa konseho niadtong Lunes nga gidumala ni bise mayor Kikang Uy.


Matod ni Salcedo nga mikunhod ang kinitaan sa syudad tungod sa kalangan sa pag-renew sa Mines and Geosciences Bureau (MGB) sa Department of Environment and Natural Resources (DENR) sa mga quarry permits sa quarry concessionaires diha sa kabukiran.


Siya miingon nga segun sa kadagkoan sa CLENRO, kini nga problema nagsumikad sa buhatan sa MGB tungod sa kalangan sa pagproseso sa mga quarry permits taliwala nga nakabayad na kini sa gikinahanglang bayronon alang sa maong permits.


Gipasabot sa konsehal nga grabe ang pagkunhod sa kinitaan sa syudad tungod kay nahikawan kini sa pagkolekta sa business permits sa Sand and Gravel nga negosyo ug sayang kaayo tungod kay dako na unta kini og matabang sa pagtunol sa serbisyo ngadto sa katawhan sa syudad.


Giingon nga didto na gadagan ang mga mopalit sa balas ngadto sa Tagoloan ug Opol inay nga dinhi sa syudad hinungdan nga naapektohan gayud ang panudlanan sa dakbayan.


Sa kadugayon sa proseso sa mga permits, dako gayud kini og epekto sa mga negosyante ingon man sa katawhan, pamahayag ni Salcedo.

Ang taho ni Salcedo giduso ni bise mayor Uy ngadto sa komite sa environment and natural resources ni konsehal Zaldy Ocon alang sa tukmang aksyon. (JRG)