Dalan dihas Zone 5, brgy Bonbon gihangyo

Konsiderahon sa komite sa urban poor ni konsehal Zaldy Ocon ang sulat nga gipaabot ni Punong Barangay Jacky Lynne Biongcog sa barangay Bonbon, ning syudad.

Kini kalabot sa gipadangat nga sulat sa mga residente sa Krisbon Home Dwellers Association dinha sa likod nga bahin sa Iglesia ni Cristo sa Zone 5, barangay Bonbon, ning syudad.

Ang mga residente mihangyo nga mahatagan og dalan alang sa kasayon sa ilang pag-agi ilabina nga wala usab silay igong outlet paingon sa public highway apan giingong kinahanglan pa sila nga molatas sa pribadong lote aron kini mapatuman.

Gipasabot sa kapitan nga ila nang nasusi ang maong dapit ug ilang nakita nga kinahanglan gayud nga makalatas sa maong pribadong lote ug gani ila na usab nga napatawag ang hintungdang tag-iya niini apan wala kini motunga sa maong higayon.

Niini, sila mihangyo sa komite ni Ocon nga matabangan ug mapangitaan sa kasulbaran ang problema sa mga residente alang sa kaayuhan sa kinabag-ang nagpuyo sa dapit. (Yonggals)