13 mil kapin ka mga tinun-an sa CDOposibleng makadawat sa educ’l aid

MOKABAT sa 13,786 ka mga tinun-an sa dakbayan sa Cagayan de Oro ang gilantaw nga makadawat sa gitunol nga financial educational assistance sa DSWD.

Kini ang unod sa taho sa DSWD nga gipresentar atol sa sesyon sa konseho niadtong Lunes nga gidumala ni Bise Mayor Bebot Rodriguez.

Mahinumduman nga si Konsehal Girlie Balaba una nang misugyot sa pagdapit sa kadagkoan sa DSWD-10 aron mahatagan sa katin-awan ang gipatumang programa ug maabagan panahon sa payout sa ingon nga malikayan ang kagubot ug pagpunsisok sa bagang duot sa mga tinun-an ug mga ginikanan.

Sa sesyon, si regional director Ramel Jamen pinaagi sa AICS focal person mitaho nga sa 29 mil ka mga rehistrante sa dakbayan taman niadtong Septembre 6, 2022, mokabat sa 13 mil kapin ang anaa sa clean list ug kini nagkinahanglan og kapin sa P41.35 milyones nga pundo.

Sugod sa pagtunol sa ayuda niadtong Agosto 20 hangtod sa Septembre 10, ning tuig aduna nay 2,348 ka mga tinun-an ang nakadawat na sa ayuda nga mobalor og P6.14 milyones.

Dugang gibutyag nga target sa ahensya nga matunolan sa umaabot nga mga schedule sa payout ang dugang 2 mil ka mga tinun-an sa dakbayan.

Hinuon, gitin-aw nga kadtong mga tinun-an lang nga gitawag nga student-in-crisis ang makadawat sa ayuda ug kadtong mga iskolar nga nagdawat og dugang insentibo gawas sa libreng tuition nga gitunol sa tunghaan o’ sponsor dili na mahimong makadawat.

Gidugang pa nga ang gikinahanglang dokumento mao lang ang certificate of enrollment o’ certificate of registration gikan sa tunghaan ug valid ID ug authorization letter gikan sa ginikanan kun ang mag-proseso dili sakop sa pamilya.

Niini, mapasalamaton si Jamen sa suporta ug pag-abag sa kagamhanan sa dakbayan dinha sa mga gipahigayong payout pinaagi sa pag-provide sa venue ug uban pang logistical ug manpower augmentation ingon man sa kwerpo sa kapolisan, AFP, CDRRMO, DOH ug uban pang kaabag nga mga ahensya gobyerno sa gitunol nga suporta.