Hangyo sa TISAMODA daling giaksyonan

Daling giaksyonan sa Roads and Traffic Administration (RTA) ang hangyo sa Tiano San Agustin Motorela Operators Drivers Assn, Inc. (TISAMODA) nga gipadangat ngadto sa komite sa Roads and Traffic Management ni konsehal Romeo Calizo.

Ang kapunungan mihangyo nga mabutangan og permanenteng traffic enforcer ang dalan Tiano -San Agustin aron malikayan ang panagbingkil sa mga driver sa motorela sa dapit.

Si Virgilio Valdehueza, presidente sa kapunungan, mibutyag nga dili mga sakop sa ilang kapunungan ang nag-okupar sa kilid sa Tiano Bros Street diin nahimutang ang yellow box kon loading ug unloading area.

Matod niya nga ang pagpundo sa mga motorela sa dapit maoy hinungdan nga mabokug ang dagan sa trapiko.

Hinuon, iyang gibutyag ngadto sa komite ni Calizo nga andam silang makigdialogo uban sa dili niini mga sakop aron malikayan ang panagbangi tali kanilang mga motorela drivers ug operators.

Niini, si Calizo mipadangat sa iyang pasalamat sa RTA sa gihimong daling aksyon aron masolosyonan ang hangyo sa TISAMODA ug mahapsay ang dagan sa trapiko sa nahisgotang dalan. (SP/El Kapitan)