Lao naninguha mamintinar kahapsay sa trapiko

Si konsehal Teodulfo Lao Jr., chairman sa komite sa public utilities, naninguha nga mamintinar ang kahapsay nga dagan sa trapiko sa dinhi sa syudad alang sa kaayuhan sa kinabag-ang katawan.

Sa kasamtangan, ang kagamhanan sa dakbayan inabagan sa komite ni Lao nagsugod na pagpahigayon og seminar o’ orientation nga gisalmutan sa mga operators ug drivers sa pampublikong sakyanan niadtong Septembre 22, ning tuig.

Matod ni Lao nga kini usa ka refresher course aron mapahimangnuan ang mga drivers ug operators sa ilang mga kaakuhan ug responsibilidad diha sa kadalanan ug malikayan ang mga kalapasan sa balaod sa trapiko.

Siya mipahibalo nga ang maong kalihukan magpadayon inaabagan sa Roads and Traffic Administration, Land Transportation Office (LTO) ug Land Transporation, Franchising and Regulatory Board (LTFRB).

Niini, si konsehal Lao hugot nga nanawagan sa mga drivers ug operators nga makigtambayayong sa maong kampanya aron mahimong hapsay ang kadalanan ug malikayan ang mga kalapasan sa balaod sa trapiko. (JRG)