Kiwanis Week saulogon sa Aug 30-Sept 5

Saulogon dinhi sa syudad sa umaabot Agosto 30 ngadto sa September 5, 2017 ang Kiwanis Week.

Kini human ang konseho sa syudad sa sesyon niadtong Lunes nga gidumala ni bise mayor Kikang Uy misagop sa resolusyon nga nagdeklara sa maong semana sa Agosto ngadto sa Septembre 2017 isip Kiwanis Week nunot sa pagsulog sa ika-42 nga District Convention (Discon) sa Kiwanis International - Philippine South District.

Si konsehal Teodulfo Lao Jr., mibutyag nga kinahanglan ang kagamhanan mopaskil og mga tarpaulin sa mga dapit nga maagian sa mga tawo aron masayud sila sa maong okasyon.

Ang maong kapunungan nahimo nang kaabag sa kagamhanan uban sa City Social Welfare and Development Department (CSWD), Department of Education (DepEd) ug Department of Social Welfare and Development (CSWD) diha sa pagpahigayon og mga community welfare and development projects nga maglambigit sa kabataan.

Ang resolusyon nga gipalabang sa konseho alang sa maong katuyuan gipaluyuhan sa komite sa pamalaod ug reglamento ubos ni konsehal Ian Mark Nacaya.