722 Japan Non-Grant Aid Reloc project masugdan na pagtukod

Hayan masugdan na ang pagtukod sa mga balay alang niadtong pipila pa ka mga pamilyang biktima sa bagyong Sendong.


Kini human giuyonan sa konseho sa syudad ubos ni bise mayor Kikang Uy sa sesyon kagahapon ang aplikasyon sa kagamhanan sa dakbayan alang sa Development Permit (DP) sa 722 Japan Non-Grant Aid Relocation Project dinha sa Pahiron, barangay Lumbia.


Ang pagpatuman sa proyekto pinasubay sa Section 18 sa Republic Act 7279 nga naglatid alang sa pagtukod og Socialized Housing Project.


Ang maong proyekto tukuron dinha sa lunang gipalit sa syudad nga adunay gilapdon nga 77,675 metros kwadrado ug gibahin bahin ngadto sa 573 ka lote.

Mahinumduman nga ang konseho subay sa Ordinance No. 13327-2017 mihatag na sa panugot alang sa Preliminary Approval and Locational Clearance (PALC) sa proyekto.


Ang nahisgotang proyekto dugay nang gikahinaman sa mga biktima sa bagyong Sendong nga hangtod sa kasamtangan wala pa gayud mahatagan sa kaugalingong mga lote desenteng pinuy-anan, pamahayag ni bise mayor Uy.


Niini, si konsehal Dometilo Acenas, chairman sa komite sa subdivision ug usa sa mga nagpaluyo sa gipalabang nga ordinansa alang sa maong katuyoan, mibutyag nga ang pundo sa pagtukod sa mga panimalay naggikan sa ayudang gitunol sa gobyerno sa Japan alang sa mga biktima sa bagyong Sendong.


Uban ni Acenas nga nagsuporta sa pagpalabang sa ordinansa mao si konsehal Ian Mark Nacaya, chairman sa komite sa pamalaod ug konsehal Romeo Calizo.