VM Kikang nanawagan sa mga Kagay-anon pagdonar og dugo

Si bise mayor Kikang Uy nanawagan sa katawhan sa syudad ingon man mga kawani sa City Hall nga adunay kapasidad modonar og dugo sa pagbisita diha sa Northern Mindanao Dialysis Clinic, Inc. (NMDCi).

Kini alang sa ipahigayong Bloodletting Activity sa umaabot Abril 22, ning tuig sa NMDCi nga nahimutang sa No. 88 J. Ebarle Street, Barangay 30 sugod sa alas 8 sa buntag hangtod sa alas 4 sa hapon.


Si bise mayor Uy mibutyag nga ang kagamhanan sa dakbayan kanunay nga nagsuporta sa National Blood Donation Program ug subay sa hangyo sa maong establisamento nga masuportahan ang maong kalihukan.

Nunot niini, ang City Hall miluwat sa Memorandum No. 0300-18 nga nag-aghat sa mga hepe sa lain laing buhatan pagpadala og mga empleyado nga modonar sa ilang dugo.


Dako kaayo kining tabang sa tanang nagkinahanglan sa dugo nga maluwas sila ug madugtongan pa ang ilang kinabuhi hinungdan nga siya nanawagan sa tanan nga kwalipikadong modonar sa pagbisita sa dapit aron magmalampuson ang kalihukan, pamahayag ni bise mayor Kikang Uy. (Yonggals)