Lao misugyot sa striktong pagpatuman sa Fire Safety Code dinhi sa dakbayan

Aron mapalapdan ang pagtuki sa isyu ug makakab-ot ang maayong posisyon gisugyot ni konsehal Teodulfo Lao Jr., chairman sa komite sa energy, nga lingkoran una sa komite sa public safety ni konsehal Romeo Calizo ug dapiton ang naglangkob sa inspectorate team ayha himoon ang fire audit inspection sa mga dagkong mall sa syudad.

Kini ang reaksyon ni Lao sa special report ni konsehal Edna Dahino atol sa sesyon sa konseho niadtong Lunes nga gidumala ni bise mayor Kikang Uy.

Kini mahitungod sa panawagan sa konsehal nga angayan masusi ang kaseguruan sa mga dagkong mall sa dakbayan human sa nahitabong sunog didto sa NCCC Mall niadtong Disyembre 23, 2017 sa syudad sa Davao diin mikalas sa 38 ka kinabuhi human kini ma trapped sulod sa maong mall ug ang sunog sa Metro Ayala Department sa Cebu City niadtong Enero 5, ning tuig.

Matud ni Lao nga mas maayong tutukan una sa komite ang mga importanteng butang aron magbinayloay dayon sa opinion ug suhestyun.

Lakip sa gisugyot ni Lao ang istriktong pagpatuman sa Fire Safety Code ug hingpit nga pagpahamtang sa multa niadtong mapalapason sa balaod. Niini, naglaum si Lao nga posibleng malikayan nato ang dili maayong panghitabo. (El Kapitan)