Salcedo padayong nagtuon sa pagmugna sa PECDO

Nagpadayon ang komite sa cooperative sa konseho ni konsehal Enrico Salcedo pagpanday sa sugyot ordinansa nga magmugna sa People Empowerment and Cooperative Development Office (PECDO).

Tumong sa maong ordinansa ang paghatag og kaseguruan sa pagpalambo sa civil societies ug mga kooperatiba isip instrumento dinha sa pagkab-ot sa social justice, quity, self reliance, economic development, people organization ug people empowerment.

Sa tigom sa komite niadtong Biernes, usa sa gihisgutan ang probisyon sa Section 5 sa sugyot ordinansa nga naglatid sa organizational structure ug staffing pattern sa gisugyot nga buhatan ug basi sa maong ordinansa, aduna kiniy tulo ka sections nga langkoban sa Operation Section, Administrative Support Section ug Information, Education and Research Section.

Si konsehal Salcedo mibutyag nga dapiton sa sunod tigom ang hepe sa Local Finance Committee (LFC), Human Resource Management Office (HRMO), City Local Environment and Natural Resources (CLENRO), City Improvement Division (CID) sa buhatan sa mayor ug City Social Welfare and Development Office (CSWDO).(Yonggals)