Pay Parking Bldgs gisugyot matukod dihas DVsoria area

Dako ang mahimong kalamboan sa dagan sa trapiko kun matukod dinhi sa dakbayan ang multi-level pay parking buildings.

Mao kini ang pamahayag ni konsehal Ian Mark Nacaya atol sa sesyon sa konseho niadtong Lunes nga gidumala ni bise mayor Kikang Uy.

Sa iyang special report, si Nacaya mibutyag sa gipadayag nga panahom ni Col. Vergel Monsanto, overseer sa Roads and Traffic Administration (RTA), nga dako ang maamot sa pagtukod og multi-level pay parking buildings dinha sa lakang pagpaluag sa kadalanan alang sa trapiko.

Niini, si Nacaya misugyot nga mahimong magamit sa kagamhanan sa dakbayan ang likod sa Amphitheater dinha sa Divisoria area nga tukuran sa maong pay parking building sama sa gitukod sa Limketkai Center nga multi-level parking building.

Mas magamit nato ang kadalanan alang sa mga motorista kun dili na dinha mo-parking ang mga sakyanan sa kadalanan, dugang sa konsehal.

Siya mihangyo sa mga negosyante nga makigtambayayong sa kagamhanan alang sa maong katuyoan. Kun makamugna kita sa maong proyekto sa imprastraktura, dako ang matabang niini sa kalamboan sa syudad ilabina dinhi sa Poblacion area ug magamit ang mga dalan alang sa traffic purposes ug transport services.

Usa kini sa mga Public Private Partnership (PPP) nga gilaraw sa dakbayan nga adunay mga negosyante nga mo-finance, construct ug operate og pay parking buildings. Dili lang usa ka edifisyo kun dili daghang pay parking multi-level buildings nga mosilbi sa matumbok nga clustered area, panapos ni Nacaya.

Ang maong taho sa konseho giduso ni bise mayor Kikang Uy ngadto sa komite sa Roads and Traffic Management ni konsehal Romeo Calizo, komite sa trade and commerce ni konsehal George Goking ug komite sa public works ni konsehal Zaldy Ocon aron ma-imbitar ang mga lokal nga magpapatigayon o’ mga imbestor nga makig-partner sa kagamhanan alang sa dugang kaarangan sa syudad.