Loteng naigo sa proyekto mabayran

Nagpadayon ang kagamhanan sa syudad pagbayad sa mga lote nga naapektohan sa mga gipatumang programa ug proyekto sa dakbayan.

Sa sesyun sa konseho niadtong Lunes nga gidumala ni bise mayor Kikang Uy, hiniusang gipalabang ang ordinansa nga naggahin sa kantidad P2,866,600.00 aron ibayad sa porsyun sa lote ni Dr. Jesus Seriña ug mga kauban nga girepresentahan ni Emmanuel Seriña nga naigo sa pag-abli sa Limketkai Road Extension gikan sa Justo Ramonal St. paingon sa J.R Borja Extension Road sa Barangay 35.

Nasayran nga ang kantidad nga gigahin alang sa maong katuyuan kuhaon gikan sa item “Continuing Appropriation, Non Office: Land Acquisition/Expropriation.

Sa maong ordinansa, gikompirma sa konseho ang gipirmajang Extra Judicial Settlement of Estate uban sa Waiver of Right sa mag sumusunod sa pamilyang Seriña.

Dugang niini, ang konseho naghatag og katungod ni mayor Oscar Moreno pagpirma sa gikinahanglang Deed of Absolute Sale.

Ang ordinansa nga gipalabang sa konseho alang sa maong katuyuan gipaluyuhan sa komite sa subdivision and landed estate ubos ni konsehal Dometilo Acenas Jr. ug komite sa pamalaod ug reglamento ni konsehal Ian Mark Nacaya. (Yonggals)