Gaane nangusog mapatuman mga programa, proyekto mag-abag sa HIV/AIDS victims

Hugot nga gisuportahan ni konsehal Malou Gaane, chairman sa komite sa panglawas, ang pagpatuman sa mga programa ug proyekto nga mag-abag aron mahatagan sa kaarangan ang kinabuhi sa mga biktima sa HIV/AIDS.

Sa pag-convene sa Local AIDS Council kagahapong adlawa ubos sa iyang pagdumala, gihisgutan ang pundo nga gikinahanglan aron mapatuman ang tahas nga gisangon kanila sa balaod sa umaabot tuig 2018.

Sa nauyonan, kapin sa P2.45 milyones ang gikinahanglang pundo aron mapatuman ang mga programa ug proyekto nga gitumong sa pagpakgang sa pagkaylap sa sakit nga AIDS ug pag-abag sa mga biktima nga mapa-arang ang ilang mga kinabuhi.

Lakip sa gitinguhang mapundohan mao ang adbokasiya sa Northern Mindanao AIDS Advocates (NORMAA) sama sa Learning Group Sessions ug therapy; pagpasiugda og AIDS Awareness sa kabatan-onan nga pasiugdahan sa City Social Welfare and Development ug pagpalit og dugang testing kits, condoms, lubricants ug reagents alang sa City Health Office ug programa sa Misamis Oriental Cagayan de Oro AIDS Network, Inc. (MOCAN).

Malaumon si Gaane nga mahatagan sa kahigayon ang pundok nga mapalapdan ang adbokasiya kontra sa HIV/AIDS dinhi sa dakbayan sa Cagayan de Oro.