FMR projects sa Bayanga, San Simon mapatuman

Gilantaw’ng mahatagan sa dugang kaarangan ang kapanginabuhian sa mga molopyo sa barangay Bayanga ug San Simon, ning syudad.

Kini human ang konseho sa dakbayan ubos ni bise mayor Kikang Uy mipalabang sa Ordinance No. 13302-2017 nga naghatag og katungod ni mayor Oscar Moreno pagpirma sa Memorandum of Undertaking (MoU) tali sa Department of Public Works and Highways (DPWH-10)-1st Engineering Office nga naglangkob sa pagpatuman sa duha ka Farm-to-Market Road (FMR) projects.

Sa sesyon niadtong Lunes nga gidumala ni presiding officer protempore konsehal Zaldy Ocon, gigahin ang P2 milyones aron magamit nga 10% paatbang pundo sa proyekto pagsemento sa Midkiwan, barangay Bayanga FMR (P1 ka milyon) ug pagsemento sa barangay Baikingon paingon sa barangay San Simon FMR (P1 ka milyones.

Si konsehal Ian Mark Nacaya, chairman sa komite sa pamalaod ug nagpaluyo sa gipalabang nga ordinansa, mibutyag nga ang pundo sa maong lakang kuhaon gikan sa item “Special Program/Projects -Upgrading/Concreting of Farm to Market Road (LGU Equity)” sa 2017 Annual Budget sa Agricultural Productivity Office.

Nasayran nga ang pagpalabang sa maong ordinansa hugot nga girekomendar ni bise mayor Kikang Uy sa tinguha nga mapatuman sa labing daling panahon ang proyekto alang sa kaarangan sa kinabuhi sa katawhan sa maong duha ka mga barangay.