Mga huwes mipasalamat sa konseho, City Hall

Dako ang pasalamat sa mga huwes, kadagkoan ug mga kawani sa Regional Trial Courts (RTC) ug Municipal Trial Courts in Cities (MTCC) sa konseho sa syudad ubos ni bise mayor Kikang Uy ingon man sa tibouk City Hall.

Sa sesyon sa konseho niadtong Lunes nga gidumala ni acting vice mayor Zaldy Ocon, miatubang ang mga huwes sa panguna ni RTC Executive Judge Dennis Alcantar ug MTCC Executive Judge Cesar Merlas aron pagpadangat sa ilang pasalamat sa kahigayonan nga mag-opisina sa City Hall sa sobra duha ka tuig.

Si Alcantar mipasalamat sa pagsagop sa dakbayan sa Cagayan de Oro, kang mayor Oscar Moreno, bise mayor Kikang Uy ug mga hepe ug kawani sa lain laing departamento sa pagdawat kanila, pagpagamit sa mga conference rooms ug pagpahulam sa mga opisina sa City Hall.

Mahinumduman nga ang korte mibalhin sa City Hall human nasunog ang Hall of Justice niadtong Enero 2015. Dili dali ang duha ka tuig nga pag-okupar namo sa City Hall ug daghan gayud ang nahasol dili lang ang mga kawani kun dili ang mga kliyente usab, pamahayag ni Alcantar.

Sa pagkahuman sa renobasyon sa Gold Ridge, andam na ang mga korte nga moukopar sa ilang bag-ong edifisyo. Si Judge Alcantar miingon nga sa ilang pagkadawat sa panugot sa Supreme Court ang edifisyo sa Gold Ridge maoy mamahimong opisyal nga Hall of Justice sa dakbayan sa Cagayan de Oro.

Sa iyang bahin, si Judge Merlas malaumon nga magpabilin gihapon ang koordinasyon ug kooperasyon tali sa City Hall ug sa mga korte.

Ang bag-ong Hall of Justice nahimutang sa Masterson Avenue duol sa SM City Cagayan de Oro ug atbang sa Searsolin -Xavier University.

Niini, si Ocon mipasalig nga magpadayon ang pagtabang sa kagamhanan sa dakbayan sa Cagayan de Oro ilabina sa konseho sa mga panginahanglan sa korte.