Daba mipahimangnu sa mga tindahan di magbaligya og sealant ngadtos kabataan

Si Konsehal Reuben Daba, chairman sa komite sa katilingbanong serbisyo, nangusog nga masumpo ang mga tindahan nga nagbaligya og Vulca Seal ug susamang substance ngadto sa mga minor de edad.

Sa tigom sa komite ni Daba niadtong Martes, ang representante sa City Social Welfare and Development Office mitaho nga aduna silay nasikop nga minor de edad nga naaktohang nagpalit og Vulca Seal sa usa ka inilang hardware ug gani nahimoan kini nila og report.

Si konsehal Daba mibutyag nga kinahanglan nga mapahimangnuan ang tanang tindahan nga dili gayud mobaligya niini ngadto sa mga minor de edad tungod kay kun masapon nga nagbaligya dili gayud magpanuko ang komite sa pagrekomendar nga marebokar ug mapasira ang tindahan sa paglapas sa balaod.

Matod ni Daba nga kinahanglan nga masumpo kini tungod kay ang pagsimhot sa sealant makadaot sa panglawas lakip na sa kaugmaon sa kabataan.

Si Teddy Sabugaa, hepe sa CSWD, misugyot nga mapatawag ang manager sa maong tindahan aron kini makuhaan sa ilang opinyon ug mapahimangnuan nga gidili gayud ang pagpamaligya niini ngadto sa mga minor de edad.

Niini, gidapit sa umaabot tigom sa komite ang tagiya o’ tigdumala sa maong tindahan aron makuha ang ilang bahin sa maong isyu. (Yonggals)