Nadya nabalaka sa pagtaas sa kaso sa AIDS sa CdeO

Nanawagan si konsehal Nadya Emano-Elipe sa buhatan sa Department of Health (DoH) ug City Health Department (CHD) nga hingusgan nila ang kampanya aron masumpo o’ mapakgang ang pagtaas sa mga biktima sa sakit nga AIDS kun Acquired Immuno Difficiency Syndrome sa dakbayan.

Gibutyag sa konsehal ang iyang nadawat nga taho nga misaka ang porsyento sa mga tawo nga natakbuyan sa maong sakit busa angayan gayud nga hatagan kini sa igong pagtagad ilabina kay matod pa kasagaran sa mga biktima mga batan-on.

Gihangyo ni Nadya ang mga nalambigit nga buhatan nga ipatuman ang mga lakang aron mapakgang ang pagkuyanap sa maong sakit.

Kun mahimo doblehon nila ang ilang gihimong kampanya ug kanunayon ang pag-inspeksyon sa mga balay kalingawan pinaagi sa pagsusi sa health cards sa mga kababayen-an nga nagtrabaho sa mga bars ug paghimo og orientation, seminars ug uban pa aron masayran sa katawhan ang epekto sa maong sakit ug kun sa unsang paagi kini makuha.

Mahinumduman nga adunay Kagay-anon nga biktima sa maong sakit ug gikabalak-an ang pagtaas niini kun dili matutukan sa lokal nga kagamhanan. (El Kapitan)