Annual Budget sa Bonbon aprobado sa Konseho

HINGPIT nang mapatuman sa Barangay Bonbon ang ilang mga programa ug proyekto karong tuiga.

Kini human ang Konseho sa syudad sesyon kagahapon nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa maong Barangay diin nasukip ang ilang 2023 Annual Budget nga adunay gibana-banang kinitaan ug galastohon balor P13,922,569.00. Lakip sa gipunduduhan sa maong budget ang pag-improbar sa Day Care Center (Phase 2); pagrehabilitar sa drainage system, daan nga health center ug Multi Purpose Building sa Food Terminal; pagtukod sa Multi-Purpose Hall Building, basketball goal sa Zone 1, ug pathways diha sa Zone 4 Daba area ug interior roadlot.

Migahin usab ang barangay og igong pundo alang sa Calamity Fund aron pagpamalit og supplies ug ekipo nga magamit panahon sa kalamidad.

Ang maong lakang miagi sa makuting pagtu-on ug deliberasyon sa Komite sa Barangay Affairs ni Konsehal Alam Lim ug Komite sa Pamalaod ni Konsehal Edgar Cabanlas ug nasuta nga nahiuyon sa balaod ug mahimo nang ipatuman sa labing daling panahon.