Giingong illegal operation sa UV Express gipasusi

Hugot nga gihangyo ni konsehal Bong Lao, chairman sa komite sa public utilities, ang Land Transportation Office (LTO) pagtino sa operasyon sa JDV UV Express.

Kini human nasayran pinaagi sa reklamo nga gipaabot sa Kisan Lu Regency Aircon Van Operators and Drivers Association nga ang JDA giingong nag-operate nga walay prankisa.

Sa tigom sa komite dili pa lang dugay, ang representante sa Land Transportation Franchising Regulatory Board (LTFRB) mipasabot nga dili mahimong mag-operate ang unit kun ang aplikasyon naka-pending pa o’ na-disapproved.

Gani, usa ka police traffic enforcer sa RTA ang misugyot pagmugna og Task Force nga mauy mosulbad sa illegal nga operasyon sa mga colorum nga sakyanan nga nagbyahian dinhi sa syudad.

Nasayran usab gikan sa LTFRB nga anaa ang Task Force Kamao nga namugna alang sa maong katuyuan apan ang problema dili sila deputized.

Niini, si Lao misugyot nga lingkoran sa komite ang maong isyu ug gipaabot nga mopatawag og laing hugna sa panagtigom uban sa giingong mga colorum operators ug mga hintungdang ahensya sa kagamhanan aron kini mahatagan sa katin-awan. (Yonggals)