Public hearing sa hangyo mausbawan pletihan sa rela ugmang adlawa

Ang konseho sa syudad ubos ni bise mayor Kikang Uy gitakda nga mopahigayon og public hearing ugmang adlawa, Biernes, Abril 13, 2018 sa alas 2 sa hapon dinha sa hawanan sa konseho.


Kini alang sa hangyo nga mausbawan ang pletehan sa motorela nga nagbyahian dinhi sa dakbayan nunot sa panawagan sa Alyansa –MP3.


Ang kapunungan mihangyo nga ma-amendar ang Ordinance No. 11670-2010 o’ Motorela Automatic Fare Matrix.


Subay sa ordinansa, ang pletihan sa rela magdepende sa presyo sa gasolina. Niini, ang regular nga pletehan mahimong P5.00, P6.00 o’ P7.00 depende sa kataas sa presyo sa produktong petrolyo samtang ang mga tinun-an sa elementarya magsugod sa P2.00 o’ P3.00 ug sa mga tinun-an sa sekondarya, kolehiyo ingon man senior citizens ug PWDs mamahimong P4.00, P5.00 o’ P6.00.


Mahinumduman nga sa tigom sa komite sa public utilities ni konsehal Teodulfo Lao, Jr., si Engr. Nonito Oclarit, assistant department head sa Roads and Traffic Administration (RTA), mipasabot nga kinahanglan adunay bracketing ang pletehan sa mga motorela aron dili maabusahan sa operator ug driver.


Unsa ang nalatid sa ordinansa maoy angayang tumanon, dugang ni Oclarit.


Ang ipahigayong public hearing pangulohan sa komite sa public utilities ni konsehal Bong Lao. Pinaagi sa maong public hearing naglaum si Lao nga makab-ot sa matag panig ang tubag sa maong panginahanglan. (El Kapitan)