Tanggal Bulok, Tanggal Usok gilaraw ipatuman na sa CdeO



Hangtod lang sa tuig 2021 ang operasyon sa mga karaang model sa mga pampublikong sakyanan dinhi sa dakbayan sa Cagayan de Oro.


Mao kini ang giluwatan sa representante sa Land Transportation Franchising and Regulatory Board (LTFRB) atol sa tigom sa komite sa public utilities ni konsehal Bong Lao sa milabayng semana.


Kini nunot sa pagtamod sa palisiya sa Tanggal Bulok, Tanggal Usok nga gitinguha nga mamahimong efficient ang sistema sa mga PUJs ug matabangan usab ang kawsa pagproteher sa kinaiyahan.


Sa maong tigom, gihatagan ang mga jeepney operators sa higayon nga ilisan ang ilang mga units sulod sa tulo ka tuig. Gani, gisugyot ang paggamit sa mga modernong unit nga daghan na ang pasahero, air conditioned, hitsas sa GPS ug mogamit na sa card ug dili cash sama sa mga gipasundayag nga mga modernong jeep didto sa kaulohan.


Niini, si konsehal Bong Lao malaumon nga dako ang maamot sa maong lakang dinha sa pagpagaan sa problema sa trapiko sa syudad. (Jhonel Tumampoc)