Validity sa session proceedings giklaro ni konsehal Gan

Si konsehal Leon Gan, chairman sa komite sa senior citizens, mipadayag sa iyang kabalaka sa kahimtang sa dakbayan human mipagawas ang ombudsman sa bag-ong dismissal order batok kang Mayor Oscar Moreno.

Kini ang gipadayag sa konsehal atol sa sesyon sa konseho niadtong Lunes nga gidumala ni bise mayor Kikang Uy.

Matud ni Gan nga kinahanglan mapasabot sa katawhan ang mga panghitabo sa pagdumala sa kagamhanan sa dakbayan aron dili kini makahatag og kalibog ug dili makabalda sa pagtunol sa serbisyo ngadto sa katawhan.

Nagtuo ang konsehal nga si Kikang Uy ang kasamtangang mayor sa dakbayan human nadawat sa kampo ni Mayor Moreno ang order gikan sa Department of Interior and Local Government pinaagi sa iyang abogado nga si Atty. Dale Mordeno.

Niini, si bise mayor Uy mipasabot nga ang korte ang labing nasayod sa estado sa syudad ug hulatan na lang ang hukom human matud pa nakakuha sa Temporary Restraining Order si Moreno aron magpabilin nga mayor sa syudad.

Ato na lang kining respitohon, pamahayag sa bise mayor.

Kita adunay tagsa tagsa ka katungod nga mopagawas sa atong mga hunahuna ug sentimento apan ato na lang paaboton ang kamanduan sa korte, panapos ni bise mayor Kikang Uy. (El Kapitan)