Solusyon sa problema sa trapiko padayong gitun-an

Nagpadayon si konsehal Bong Lao, chairman sa komite sa public utilities, pagpangita sa paagi nga masolusyonan ang problema sa trapiko dinhi sa syudad.

Sa milabayng tigom sa iyang komite, nagkahiusa ang LTO, LTRFB ug RTA ug uban pang ahensya sa gobyerno nga nalambigit sa pagpatuman sa mga balaod sa trapiko sa pagtuon sa mga lakang nga magpagaan sa dagan sa trapiko dinha sa kadalanan.

Kini human si Engr. Nonito Oclarit sa RTA misumete sa plano kalabot sa “Abstract of Local Public Transport Route”. Siya mibutyag nga padayon ang ilang pagplano ug pagpangita sa solusyon sa trapiko.

Lakip niini mao ang gipahigayong pagsusi nga gilantawng mahuman sulod sa duha ka bulan kalabot sa mga dapit diin ipahumtang ang mga loading ug unloading zones, parking areas, pedestrian lanes ug uban pang mga traffic signs sa kadalanan.

Ang maong lakang paborableng gipaluyohan ni konsehal Bong Lao ug Reuben Daba dala ang pasalig nga motabang aron mapadali ug magmalampuson ang planong pagabuhaton. (Jhonel C. Tumampoc)