Corruption dihas public markets, terminal gitinguhang mapakgang



Si konsehal Ian Mark Nacaya, chairman sa komite sa economic enterprise ug overseer sa City Economic Enterprise Department (CEED), naninguha nga mapakgang ang korupsyon dinha sa kamerkadohan ug terminals sa dakbayan.


Sa tigom sa komite kagahapon, si Nacaya mipadayag sa gilaraw nga pagtangtang sa mga Revenue Collection Clerks nga gitahasan sa pagsingil sa mga sukay ug terminal dispatching fees.


Imbis na revenue collectors, mas mapalambo ang serbisyo sa kamerkadohan ug terminals kun mga security ug sanitation personnel ang ipahimutang, dugang sa konsehal.


Gawas nga mapakgang nato ang korupsyon, malikayan usab ang unfair competition practices nga maglambigit sa mga kawani sa gobyerno ug sa mga mamaligyaay sa merkado ug mga nag-abang sa terminal.


Sa ipalabang nga balaodnon, mamahimong mobayad direkta sa opisina ang adunay tulubagon sa dakbayan ug mahimo kini matag semana bayran.


Gitumbok ni Nacaya ang pagbayad sa dispatching fee dinha sa terminal nga ginabayaran matag gawas sa mga bus. Matod ni Nacaya dili na kinahanglang mobayad matag gawas sa bus kun dili ihapon na pipila ka bus ang mibyahe sulod sa usa ka semana ug maoy bayran direkta sa opisina.


Gawas nga mapalambo nato ang operasyon sa merkado ug terminal, mahatagan pa nato og kapaseguroan ang mga mosulod ug mogawas sa terminal, pasabot ni Nacaya.