Task Force gimugna pag-monitor sa presyo sa bugas sa dakbayan



Sa tinguha nga maproteksyonan ang tanang konsumedor sa dakbayan, si konsehal George Goking, chairman sa komite sa trade and commerce, sa tigom sa milabayng semana, mimugna sa Task Force (TF) nga tahasan pagmonitor sa presyo sa bugas dinhi sa dakbayan sa Cagayan de Oro.


Ang maong TF gipangulohan ni National Food Authority (NFA-10) regional director Fernando Nuñez uban sa pipila ka mga stakeholders sama nila ni Atty. Egay Uy, hepe sa Special Task Force sa City Hall, DTI-10 director Linda Boniao ug mga tag-iya ug tigdumala sa pipila ka mga pribadong kompanya dinhi sa syudad.


Sa maong tigom, si Nuñez mipadayag nga walay kakulangon sa supply sa bugas dinhi sa syudad. Gani, adunay paabuton nga bag-ong stocks sa bugas sa umaabot 40 ka adlaw nga gi-angkat gikan sa Thailand ug Vietnam nga mokabat sa 220 metric tons o’ 5.7 bilyones ka sako sa bugas diin ang rehiyon 10 adunay pahat nga mokabat sa 5 mil ka kahon.


Apan, matod pa, gikinahanglan ang pagmonitor sa presyo tungod kay dili maseguro nga parehas ang presyo sa paga-angkaton nga bugas ug sa lokal nga commercial rice nga buot usab nilang paliton aron magpabilin nga igo ang supply.


Sa iyan bahin, si Goking mipadayag sa iyang hugot nga suporta sa maong Task Force.


Gitataw atol sa tigom nga dili angayang mabalaka ang katawhan tungod kay wala gayuy kakulangon sa supply sa bugas sa syudad. (Mary Jane del Puerto with reports from APD)