Konseho nangusog mapatuman sa hingpit pabahay program

Ang konseho sa syudad ubos ni bise mayor Kikang Uy padayong naninguha nga mahatagan sa ilang mga kaugalingon ug desenteng panimalay ang mga Kagay-anon.

Sa milabayng sesyon, gipalabang sa konseho ang Ordinance No. 13373-2018 nga naghatag og katungod sa mayor pagpirma sa Contract to Sell tali sa mga benepisaryo sa Socialized Housing Program sa dakbayan.

Kini lakip na sa mga benepisaryo sa Piso-Piso Program ug uban pang kasamtangang relocation sites sa syudad sa ubos ug reasonable nga presyo pinasubay sa Ordinance No. 13178-2016 nga giamendar sa Ordinance No. 13319-2017.

Si konsehal Zaldy Ocon, chairman sa komite sa urban poor ug nagpaluyo sa ordinansa, mibutyag nga nasukip sa maong Contract to Sell ang termino sa pagbayad gikan sa usa ngadto sa lima ka tuig, 10 porsyento (10%) nga downpayment sa 6% per annum nga interest.

Niini, ang mga benepisaryo makaangkon sa titulo sa lote ug balay sa panahon nga mapirmahan ang Deed of Sale ug mabayran ang acquisition cost balor sa na-award nga area.

Ang ordinansa nga gipalabang sa konseho alang sa maong katuyoan gipaluyohan sa komite ni Ocon ug komite sa pamalaod ni konsehal Ian Mark Nacaya.