Ocon mihangyo masusi loteng gisugyot himuong menteryo


Hugot nga gihangyo sa komite sa public works ni konsehal Zaldy Ocon ang mga kawani sa City Assessors Office nga mosumete sa ilang appraisal report sulod sa 15 ka adlaw human mapahigayon ang ocular inspection sa barangay FS Catanico.


Kini ang hangyo ni Ocon atol sa tigom sa komite sa milabayng adlaw.


Matod niya nga dili angay langayon kini kay halos puno na ang lubnganan diha sa City Cemetery. Gani, ang uban nga minatay atoa na sa pangpang nga bahin gilubong.


Mahinumduman nga nagplano ang syudad og himo sa bag-o nga City Memorial Park alang sa mga igsoon nga muslim ug kristiyanos nga mopanaw sa laing kalibutan diha sa barangay FS Catanico.


Gitumbok nga ang loteng gipanag-iyahan ni Vince Amora maoy gamiton alang sa maong katuyoan human kini mipadayag nga andam makigsabot ug mobaligya sa lote pabor sa syudad.


Nunot niini, gihangyo ni Ocon ang buhatan sa City Assessor’s, City Engineer’s ug City Finance sa pagpahigayon sa ocular inspection sa dapit. (El Kapitan)