Konseho mipalabang sa Integrated Ecological Solidwaste Mgmt Law

Giuyonan na sa konseho sa syudad ubos ni bise mayor Kikang Uy ang ordinansa nga naglatid alang sa Integrated Ecological Solid Waste Management Law sa dakbayan sa Cagayan de Oro.

Tumong sa maong ordinansa nga mamugna ang mga gikinahanglan mekanismo ug insentibo alang sa mga organisasyon nga makatamod niini sa hingpit.

Ang maong balaod nagdeklara usab sa mga gidiling binuhatan ug nagpahamtang sa multa alang sa mga kalapasan sa probisyon niini.

Kini nagprovide alang sa mandatory segregation, koleksyon ug pagbalhin sa mga basura lakip na ang pagtukod sa bag-ong Sanitary Landfill, pagmintenar sa limpyo ug mahindik nga palibot sa landfill ug junk shop operation ug uban pa.

Segun sa Section 16 sa Akta Republika No. 9003 kon Ecological Solid Waste Management Act of 2003, ang mga lokal nga kagamhanan gitahasan sa pagmugna sa ilang local solid waste management board nga gimanduan paghikay sa 10-year solid waste management plan uyon sa National Solid Waste Management Framework.

Ang maong lakang naglakip sa management plan alang gayud sa re-use, recycling ug composting waste generated diha sa ilang tagsa tagsa ka ginsakupan.

Sa laing bahin ang mga local nga kagamhanan mopahamtang og balayronon sa kantidad nga igo sa pagbayad sa galastohon sa paghikay, pagsagop ug pag-implementar sa solid waste management plan segun sa balaod.

Ang ordinansa nga gipalabang sa konseho alang sa maong katuyuan gipangamahanan nila ni konsehal Zaldy Ocon, chairman sa komite sa environment ug konsehal Edna Dahino, chairaman sa komite sa panalapi.

Kini gipaluyuhan usab sa komite sa pamalaod ug reglamento ni konsehal Ian Mark Nacaya. (Yonggals)