Relocation project dihas Balubal mapatuman ubos sa NHA program

Gilantaw nga mapatuman ubos sa programa sa National Housing Authority (NHA) ang pagtukod sa relocation project dinha sa barangay Balubal.


Kini human ang konseho sa syudad ubos ni bise mayor Kikang Uy mipalabang sa ordinansa nga naghatag og katungod ni mayor Oscar Moreno pagpirma sa Memorandum of Agreement (MoA) tali sa NHA alang sa maong katuyuan ubos sa Resettlement Assistance Program for Local Government Units sa ahensya.


Mahinumduman nga ang kagamhanan sa dakbayan nag-alokar sa 6.9 hektaryang lote dinha sa Balubal isip relocation site sa mga molopyo sa syudad nga biktima sa bagyong Sendong.


Sa maong MoA, ang NHA mogahin og P16 milyones aron magamit sa mobilization/demobilization, preliminaries ug uban pang services, road works ug drainage works sa relocation site.


Niini, makuha balik sa kagamhanan sa dakbayan ang pundong gigamit pagpalit sa lote pinaagi sa pagbaligya sa mga lote ngadto sa mga benepisaryo basi sa ipalabang nga ordinansa sa konseho sa syudad.


Ang maong lakang sa konseho gipaluyohan sa komite sa panalapi ni konsehal Edna Dahino, komite sa ways and means ni konsehal George Goking, komite sa subdivision ni konsehal Dometilo Acenas ug komite sa pamalaod ni konsehal Ian Mark Nacaya.