Annual budget sa 9 brgys giaprobahan

Hugot nga gisuportahan ni bise mayor Kikang Uy ang pagpatuman sa siyam ka barangay, ning syudad sa ilang mga programa ug proyekto karong tuiga.

Kini human ang konseho sa sesyon niadtong Lunes nga gidumala sa bise mayor hiniusang misagop sa managlahing resolusyon nga nag-uli sa ordinansa sa Barangay No. 6, 9, 17, 20, 25, 31, Dansolihon, Lumbia ug Tignapoloan diin nasukip ang ilang 2018 Annual Budget alang sa implementasyon.

Nasulod sa maong budget ang listahan sa tanang programa ug proyekto nga gihatagan og prioridad nga ipatuman sa nahisgutang mga barangay karong tuiga alang sa kaugmaran sa ilang mga molopyo.

Si bise mayor Kikang Uy mipasabot nga hugot niyang gisuportahan ang lakang pagpatuman sa mga programa ug proyekto sa maong siyam ka mga barangay sa tinguha nga daling masinati sa katawhan ang kaarangan ug kalamboan sa ilang dapit sa ingon nga ang matag usa mahatagan sa patas nga kahigayon sa serbisyo nga gitanyag sa kagamhanan.

Ang resolusyon nga gipalabang sa konseho alang sa maong katuyuan gipaluyuhan sa komite sa barangay affairs ni konsehal Yan Lam Lim ug komite sa pamalaod ug reglamento ubos ni konsehal Ian Mark Nacaya. (Yonggals)