Pundo pagtukod og school bldg dihas Taguanao, Indahag gihangyo

Gipaabot hisgotan sa tigom sa umaabot Biernes sa komite sa edukasyon ni konsehal Suzette Magtajas-Daba ang gipasakang Resolusyon No. 18-2017 sa konseho sa barangay Indahag.

Kini naghangyo nga magahinan og igong pundo ang ilang gilaraw nga 4-storey building nga adunay upat ka lawak saringan dinha sa Sitio Taguanao, Indahag.

Lakip sa hisgotan mao ang pagdili sa paggamit sa toga panahon sa gradwasyon.

Kini human ang Rehiyonal nga buhatan sa Department of Education (DepEd) mipagawas og memorandum ngadto sa mga tunghaang publiko sa dili na paggamit og toga apan ang school uniform lamang ang gamiton sa maong okasyon.

Buot masayran sa mga ginikanan kun unsa ang rason sa maong pagdili ug usab ang venue sa gradwasyon diha lamang ipahigayon sa mga tunghaan. Nasayran gikan sa usa sa mga ginikanan nga ang maong memorandum dili gikan sa nasyonal kun dili sa rehiyon 10 lang. (APD)