P5.5B kapin 2018 Oro budget aprobado na

Aprobado na sa konseho sa syudad ubos ni bise mayor Kikang Uy ang kapin sa P5.5 bilyones nga budget sa dakbayan sa Cagayan de Oro.

Sa sesyon niadtong Lunes, gipalabang ang ordinansa nga naggagahin sa dili mominus P5.14 bilyones nga budget alang sa General Fund sa kasamtangang tuig 2018 ug laing P417 milyones kapin alang sa Special Account: Local Economic Enterprises/Utilities.

Kini human gisumete sa buhatan sa City Budget ang mga kausaban nga nauyonan sa konseho atol sa gipahigayong budget hearing sa milabayng tuig nga gidumala ni konsehal Bong Lao.

Kini naglakip na sa omento sa pundo alang sa Peace and Order Development Program ug Sports and Cultural Development ug legislative monitoring programs and projects.

Sa maong giaprobahang budget, ang konseho migahin og P80 milyones alang sa Land Acquisition/Expropriation ug P214 milyones kapin alang sa 5% Local Disaster Risk Reduction and Management Fund (LDRRMF).

Gikalipay ni konsehal Edna marban-Dahino, chairman sa komite sa panalapi ang pagpalabang sa maong budget. Bisan kun ang maong budget ubos sa gisumeteng executive budget ni Mayor Oscar Moreno, ang konsehal namahayag nga ang mga angayan lang hatagan og prayoridad nga mga proyekto sa dakbayan ang gipundohan ug kun sa higayon nga magkulang andam kini dugangan pinaagi sa pagpalabang og supplemental budget. (with reports from APD)