Hydro dam dihas Talakag gikinahanglan –Ocon


Gitakdang dapiton sa tigom sa Pebrero 7, ning tuig sa komite sa environment and natural resources ni konsehal Zaldy Ocon ang kadagkoan sa Bukidnon Hydro Energy Corporation ug ang mga opisyal sa lokal nga kagamhanan sa Talakag, Bukidnon.

Kini aron paghatag og katin-awan sa matod pa pagtukod og dam diha sa barangay Besigan, sakop ning syudad ug Talakag, Bukidnon. Matod ni Ocon nga buot niyang sutaon kun nakasunod ba ang maong kompanya sa mga rekisitos nga gikinahanglan.

Lakip usab niini ang paghimo sa public consultation sa dapit nga tukuran sa maong proyekto.

Mahinumduman nga nagpadangat sa iyang special report si konsehal Jay Pascual, chairman sa komite sa turismo, kalabot sa giingong pagtukod sa dam sa dapit diin posibleng makaapekto kini sa turismo sa syduad ug delikado sa mga mahitabong trahedya sama sa pagbaha.

Atol sa tigom sa komite sa environment, mipadangat sa ilang pagsupak nga matukod ang dam ang Oro Rafters Association tungod kay matod pa makahunas kini sa suba kay diha naman sila magkuha sa tinubdan sa tubig.

Dako kaayo ang epekto niini sa turismo sama sa river rafting diin ang dakbayan maoy naila sa nasud.

Gipahayag usab ni Dorothy Jean Pabayo, chairperson sa City Tourism Council nga kinahanglan ang pag-review niini gumikan kay daghan ang apektado busa lakip siya misupak niini.

Nunot niini, subling magtigom ang komite aron lingkoran ang nasangpit nga isyu tungod kay seryuso kini nga butang. Lakip sa dapiton sa maong tigom ang kadagkoan sa simbahan, lumad ug ubang sector sa katilingban. (El Kapitan)