Dahino misugyot masusi edifisyo sa mga dagkong tindahan sa CdeO

Angayan masusi ang kapaseguroan sa edifisyo sa mga dakong tindahan dinhi sa dakbayan.


Mao kini ang panawagan ni konsehal Edna Marban-Dahino atol sa regular sesyon sa konseho niadtong Lunes nga gidumala ni bise mayor Kikang Uy.


Sa iyang special report, gipaabot ang kahingawa sa konsehal na nahitabong sunog didto sa NCCC Mall niadtong Disyembre 23, 2017 diin 38 ka mga kinabuhi ang nakalas human matod pa na-trapped sulod sa maong mall.


Dugang pa, mao usab ang sunog niadtong Enero 5, 2018 sa Metro Ayala Department Store sa Cebu City diin ang maong sunog giingong nagsugod sa stock room.


Niini, si Dahino mipasabot nga karong panahona gikinahanglan nga masayran kun unsa ka safety ang mga shopping malls dinhi sa dakbayan.


Kining mga dagkong tindahan nahimo na nga suroyanan sa katawhan ug gikinahanglan ang fire safety, sumpay sa konsehal.


Iyang gipanawagan ang pagpahigayon og Fire Safety Audit inspections sa mga malls ug usab pagtino kun hingpit bang napatuman ang Fire Safety Code aron malantaw kun ang occupational safety ug health standards (OSHS) sa mga trabahante dihas mga malls napatuman aron malikayan ang susamang mga panghitabo.


Ang fire safety audit team langkoban sa mga buhatan sa City Fire Department, Office of the Building Official (OBO), City Engineer’s Office ug Department of Labor and Employment. (APD)

Salcedo padayong nagtuon