Road Devt project sa Balulang tun-an sa kom sa public works

Daling giaksyunan sa buhatan sa konseho ubos ni bise mayor Kikang Uy ang resolusyon nga gipalabang sa barangay Balulang.

Kini nagpahibalo ni Mayor Oscar Moreno nga sila nag-implementar sa proposed development project nga mao ang pag-abli og access road gikan sa SM City Cagayan de Oro paingon sa Manresa, Xavier University College of Agriculture ug gilayon paingon sa Sitio Macanhan, barangay Carmen.

Nasayran nga nasulod sa 5-Year Development Plan sa barangay ang proyekto ug ilang gisugyot nga masukip kini sa 8 Point Agenda sa kagamhanan sa dakbayan.

Sa maong resolusyon, gipasabot nga sa miaging katuigan nakasinati sa barangay ang nagkalain lain nga bagyo og gani daghang mga kinabuhi ang nakalas tungod sa pagtaas sa tubig ug kini nahitabo matod pa sa kakulangon sa access ug exit roads sa mga molopyo nga mahimo unta nila nga kaagian sa maong mga higayon.

Dugtong niini, gipaabot usab sa barangay nga gikinahanglan gayud nga makaabli og acces road aron kun adunay mga susamang katalagman ila kining magamit pag-agi paingon sa taas taas nga bahin sa barangay.

Ang maong hangyo sa Balulang giduso ni bise mayor Kikang ngadto sa komite sa public works ni konsehal Zaldy Ocon alang dugang pag-aksyon ug rekomendasyon.(Yonggals)