Ocon mohimo og ocular inspection dihas Lapasan

Hayan mahatagan na og kahimutangan sa ilang fishing boats ang mga mangingisda diha sa barangay Lapasan, ning syudad.

Kini human ang komite sa urban poor ni konsehal Zaldy Ocon uban sa mga kawani sa Department of Environment and Natural Resources (DENR-10) ug Department of public Works and Highways (DPWH-10) mohimo og ocular inspection sa dapit karong adlawa Enero 16, ning tuig.

Matod ni Ocon nga mas maayo nga personalon og tan-aw ang dapit aron makita kun asa makapahilona ang mga baroto sa mga mangingisda ug mapahigayon dayun ang pagtrabaho sa construction.

Nasayran nga gipangddemolish sa DPWH ang mga informal settlers daplin sa Coastal Road tungod sa nagpadayon niini nga proyekto.

Hinuon, naglaom si Ocon uban sa panugot sa DPWH nga mahatagan sila sa dapit alang sa maong katuyuan.

Dugang sa konsehal nga angayan nga hatagan kini sa pagtagad kay kini lang ang panginabuhi sa ilang pamilya.

Nunot niini, gikalipay ug gipasalamatan sa mga sakop sa Lapasan Fisherfolk Association ug ni kapitan Omar Labuntog ang nahimong paningkamot sa komite ni konsehal Ocon. (El Kapitan)