City Vet nangusog mapakgang ang pagkaylap sa rabies

Mokabat sa 93 ka laawng iro ang nahipos sa City Pound Section sa City Veterinary Office sa bulan sa Disyembre sa milabayng tuig 2017.

Kini sulod sa gipahigayong pito ka operasyon diha sa nagkalain laing barangay, ning syudad human nakita nga naglatagaw sa kadalanan nga nakahatag og pelegro sa katawhan.

Sa report nga giduso ni city veterinarian Dr. Perla Asis ngadto sa komite sa panglawas sa konseho ni konsehal Malou Gaane, nasayran nga sa maong gidaghanon unom lang niini ang nalukat sa mga hintungdang tag-iya samtang ang nahabiling 87 ka iro ang gipailawom sa euthanasia.

Sa maong higayon, gikataho usab nga 4,347 ka mga iro ang nabakunahan sa anti-rabies.

Niini, si konsehal Gaane nagpasalamat sa buhatan sa padayong pagpatuman sa kampanya sa kagamhanan alang sa kapasiguruan sa katawhan sa tinguha nga mahalikay ang katawhan sa sakit nga rabies. (Yonggals)