Kikang malaumon sa malinawong pagsaulog sa Adlaw sa Nazareno

Dako ang panghinaut ni bise mayor Kikang Uy nga magmalinawon ang pagsaulog sa Adlaw sa Hesus nga Nazareno karong adlawa.

Taliwala nga nangandam ang mga hintungdang ahensya sa kagamhanan sa dakbayan aron magmalinawon ang gitakdang prosesyon ug kalihokan pahaum sa kasaulogan, gikinahanglan gihapon ang pag-abag sa katawhan aron kini magmalampuson, dugang sa bise mayor.

Gilauman nga magpunsisok ang bagang duot sa mga deboto sa Nazareno aron pag-ambit sa kasaulogan nga tinuig nga ginasaulog sa tibouk kalibotan.

Adunay ruta nga gihan-ay ang Roads and Traffic Administration uban sa Cagayan de Oro Police Office, CDRRMD ug uban pang ahensya sa gobyerno aron pagseguro nga luwas sa peligro ang tanang mosalmot sa prosesyon nga magsugod sa alas 5 sa buntag dinha sa San Agustin Cathedral agi sa Fernandez Street, left turn sa dalan Velez, left turn sa CM Recto Avenue paingon sa Simbahan sa Nazareno, butyag ni bise mayor Uy.

Niini, siya naghangyo nga unta ang mga deboto nga adunay sakit sa alta presyon, kadtong adunay mga kabilinggan sa panglawas ingon man mga buntis, adunay gagmay’ng mga bata ug uban pang adunay kakulian dili na mokuyog sa prosesyon aron malikayan ang mga aksidente, dugang hangyo ni bise mayor Kikang Uy.