P34.5M gisugyot nga budget sa COCPO operations sunod tuig

Gipaabot nga mapalapdan sa kapolisan ang ilang kampanya alang sa kahusay ug kalinaw sa syudad.

Kini human ang Cagayan de Oro City Police Office (COCPO) gilantaw nga makapatuman sa ilang gilaraw nga mga programa ug proyekto sa sunod tuig ubos sa gisumeteng P34.5 milyones nga budget sa tuig 2018.

Nasayran nga ang gipangayo nga gahin miagi sa makuting pagtuki ug pagtuon ug giuyonan in principle sa konseho ubos ni bise mayor Kikang Uy atol sa miaging budget deliberation nga gidumala ni konsehal Teodulfo Lao Jr.

Lakip sa gigahinan sa maong budget ang pagpamalit og office equipment, handheld radios ug mga closed circuit television diin ang P2 milyones usab gigahin alang sa financial incentives sa 1,100 ka mga polis nga nadestino dinhi sa syudad.

Niiini, ang konseho malaumon nga sa maong budget, labing mahatag sa kapolisan ang epektibong serbisyo ngadto sa katawhan diha sa pagmintinar sa kahusay ug kalinaw sa syudad. (Yonggals)