Ruta gikan sa Laguindingan Airport paingon sa SM Downtown gihangyo

Ang konseho sa syudad ubos ni bise mayor Kikang Uy naninguha nga mahatagan sa kasayon ang pagpanakayan sa mga mobyahe paingon sa airport ug pabalik dinhi sa dakbayan sa Cagayan de Oro.


Sa Resolosyon No. 12859-2017 nga gisagop sa konseho sa sesyon niadtong Lunes, hugot nga gihangyo ang rehiyonal nga buhatan sa Land Transportation Franchising and Regulatory Board (LTFRB-10) pag-abli og ruta gikan sa SM CDO Downtown Premier paingon sa Laguindingan Airport ug pabalik alang sa Shuttle Transfer Service (STS).


Si konsehal Bong Lao, chairman sa komite sa public utilities ug usa sa mga nagpaluyo sa maong lakang, mibutyag nga adunay gihikay ang Roads and Traffic Administration (RTA) nga ruta alang sa inflow ug outflow sa maong shuttle service sa tinguha nga dili kini makadugang sa kapiot sa dagan sa trapiko sa sentrong bahin sa syudad.


Niini, ang konseho mipadayag usab sa ilang pag-uyon sa aplikasyon alang sa Certificate of Public Convenience sa Odyssey Airport Express Corporation pag-operate sa nahisgutang bag-ong ruta.