TF Sanitary Landfill mohimo’g pagsusi sa Dis. 7

Gitakda nga mopahigayon og pagsusi sa umaabot Disyembre 7, 2017 dinha sa Sanitary Landfill sa barangay Pagalungan ang Task Force Cagayan de Oro Sanitary Landfill sa panguna ni konsehal Suzette Magtajas-Daba.

Kini ang nauyonan human nagtigom ang Task Force sa milabayng semana sa tinguha nga matubag ang reklamong gipaabot ni kapitan Rodolfo Nacario sa barangay San Simon nga adunay pag-overflow sa water waste gikan sa lecheate pond sa landfill paingon sa Iponan River.

Matod pa nga kini ang hinungdan sa pagtakboy sa sakit ngadto sa pipila niini ka molopyo sa barangay ug sa pagkamatay sa mga isda ug uban pang mananap nga nabuhi diha sa suba.

Ang maong tigom gitambongan sa mga ahensya sa kagamhanan nga adunay dakong kalambigitan sa kinaiyahan.

Niini, nauyonan ang pagpahigayon og water testing sa Iponan River gikan sa ibabaw nga bahin sa landfill, duol sa site ug sa tubig sa suba aron matumbok ang tinuoray nga gigikanan sa giingong problema.

Dugang pa, kinahanglan nga adunay audit report sa physical ug sa mga dokumento kun ang tanan nasubay sumala sa nakalatid sa gi-isyung Environmental Compliance Certificate (ECC) sa DENR. Kinahanglan usab nga adonay ibutang nga CCTV camera diha sa lecheate pond ug dumpsite ug pagbutang usab sa rain gauge aron masayran kun tinuod ba kini nga nag-overflow panahon sa ting-ulan. (APD)